"فُكُّو الحِبَال"
...............................................................
 |
(مأساة العبارة السلام 98) |
بمناسبة مرور أربعة سنوات على مأساة العبارة السلام 98
د. توفيق ماضى
*****
"فُكُّو" الحِبَال "بِلْعَجَلْ دَا الباخْرَهْ رَايحَه مَصْر
بِإِذن ألله هَنِمْشِى بَعْد صَلاة العَصْر
نِطْوِى سِنِينْ الفُرَاق الصَّعْب اللِّى طَال
وَحَشِتْنَا كَام طَبْطَبِه، دا عَرَقْنَا مِحْتَاج عَصْر
******
"عَبد الله" قاعد "مِجَعْمِزْ"، بَعْدِ ما "سَتِّفْ عِزَالُهْ"
يِحْلَم بإنُّه فى ثَانيه يِقْدَرْ يِقَابِلْ عِيَالُهْ
يِسْمَعْ و يِحْكِى مِعَاهُم وِيضُمْ فِيهُم لِحُضْنُهْ
مِن يوم ما سابْهُمْ بِيِبْكِى، وهو شَادِدْ رِحَالُهْ
******
وِ هناَك "مَلاَكْ" اللِّى عَاشِق، سَارِحْ فى رُكْنْ بِعِيدْ
يِرْسِمْ فى "إكْلِيلْ" جَوَازُهْ، قَاعِدْ يِعِيدْ ويزِيدْ
وِ"مَاتِلْدِهْ" وَاقْفِه فِى "إسْنا" تِسْتَنَّا تُوبْ الفَرَحْ
مَاهُو الزِّفَافْ فِى الكِنِيسِه، هَيْكُون فِى يُومْ العِيدْ
******
وِ "أبو مَرْوَه" بعد السِّنِين إِتْبَهْدِلِتْ هَالْتُه
رَاجِعْ وِشَاكِر لِرَبُّه، رَاضِى قـَوى بِحَالْتُه
نِفْسُه يِجَاوِرْ حَبَايبُه اللِّى غَاب عَنهُم
يِحْلَمْ فِى مِينِةْ "سَفَاجَا"، بامُّه وكَمان خَالتُه
******
وِ"صَبَاحْ" مَعَاهَا العِياَلْ "سَابُو" "حِسين" فِى "ضِبِه"
قَضُّو مَعَاه الأجَازِة، لازم يِرْجَعُو لِ "بِبِه"
"حِسينْ" فِى سَاعِة الوِداع كان مِنْكِسِر مَجْرُوح
مِ الدّمْعَه فِى عِيونْ "صَبَاحْ" وِ"مِصطفى" وِ"هِبِه"
******
الكُلْ قاعِد بِيِحْلَم يِلْمِسْ رِمَالْ البَر
وِ"تيتا" تِدْعِى فى "سَفَاجِه"، ييجوا العِيَالْ بِلاَ شَرْ
وِتشُوف وَلِيدْهَا وِ"مَرْوه" قبل "مَـتْوَدَّعْ"
وِ يـْكَفِّنُوهَا بإيدْهُم وِ يْوَصَّلُوهَا لِبَرْ
******
"المِينَا" قالت مَـتِمْشُم داحْنَا بَقِينا "العِشِهْ"
كِفَايه "تَسْتِيفْ" فِى خَلْق، يَا خْوَنَّا حَبِّةْ خِشِهْ
"مَارْكِبْكُو" شَايلَه كِده فوق الحُمُولة كِتِير
"مَتْشِدّ" حِيلَكْ يَارَيـّس وَ للاَّ مُوتُورَكْ "نِشِهْ"
******
"الباَخْرَه" "كُهنَه" قَدِيمِه لكن صاحِبْهَا كِبِيرْ
واصِل لِحَدّ النِّهايهْ يِقْدَرْ يِمَضِّى وَزِيرْ
عُمْرَكْ ما تِقْدَرْ تِطُولُه أصْله مِتْحَصَّنْ
يِعْرَفْ يِجِيبْلَكْ شِهَادِه إن المَصِيفْ فى"أمْشِيرْ"
******
"الباخْرَة" مَاشْيـَة "تِهـَكّعْ" أصْل المَكَنْ خَرْبَانْ
والكُل كَاسُه فِى "عِبـُّه" وفِى الهـِمُومْ سَرْحَانْ
سَاكِتْ وصَابـِر عَشَان يـِوْصَلْ بإذن الله
خـَايفْ يـِبَرْطـَمْ مِعَاهـُمْ أصْلـُه فـَقـِيرْ غـَلـْبـَان
******
عَلى غـَفـْلـَة شِلـِّة بـِتـُصْرُخ "يَا قـُبُّطـَان غِيتـْنِه
دا فيه حَريقـَه و دَخـَنِه،يـَا قـُبـُّطـَان غِيتـْنـِه
"الباخْرَة" بَدإتْ تِمِيلْ، يـَاقـُبـَطـَان غِيتـْنـِه
عَايزين حِكـُومِة بَلـَدْنـَا تـِنْجـِدْنـَا فى غـُرْبـِتـْنـِه"
******
البَحْر الأحمر بقى عَتـْمَة وشَكـْلـُه كـَئيب
و الكـُل يدَّنْ فى مَالطة وِصْرِيخْهُمْ مَالِهْشِى مُجيب
دَ الباخـْرَة عَمـَّالـَه تـِغـْرَقْ والخَلق مَرْعُوبـِه
وِكُل واحِد مِشَعْبَط، مَاسِكْ فى إيدُه حَبـِيبْ
******
أبُو مَرْوَة يـِرفـَع فى صُوتـُه وبقْرَى كـَام آيـِة
وِصَبـَاحْ تِقـُول للعِيـَال إِتـْشَاهـْدُوا وَ يـَّايـِة
دَا لِكـُل أجـِلٍ كـِتـَاب وِهِىّ دِى الآخْرة
وِكـُل غـَرْقـَانْ شَهـِيدْ وِ قِصـِّتـُه حِكـَايـِة
*****
يا بَحْر "خَتْ" الحَبَايبْ مِن بَعْدْ غُرْبَهْ وشُوقْ
إرحَمْ جِرَاحْ كُلْ غَايِبْ مَلْهُوفْ وكُلُّه شُوقْ
"طَبْطَبْ" عَليهُم" وخُدْهُمْ فى "غَويطَكْ" اللِّى بِعِيدْ
يِمْكِنْ "يِلاَمسُوا" رِمَالهْاَ و يطَفُّوا حَبِّةْ شُوقْ
******
يا "حاجّه" قُومِى "نِرَوَّحْ"، دا البحْر قَفَلْ البَابْ
هوّ دَفَنْ من غيركَفَنْ، هوّ حَضَنْ مِنْ غَابْ
رَبِّكْ يِعَوَّضْ عَلِينا ويِخْسِفْ الظَّالِم
وِيِصَبَّر انتِى وَانَا وِبقِية الأحْبَابْ
******
أنا مش مِسَامْحَهْ فى حَقِّى حَتّى لِيُومْ الدِّين
أنا لازم آخد "بِطَارِى" حتّى لو كان مِين
فين "جِتِّتْ" ابنى و "مَرْوِه"، ياما حِلِمْتْ سِنِين
أشيل لإبنى ولاده قبل ما روح الطين
******
دى حِيتَانْ يا "حَاجّه" عَجِيبِهْ، مَفْجُوعَةْ تِجْمَعَ مَالْ
ما يهِمِّهَاشْ رُوح بَرِيئَهْ، ولا دَم قُوم لَوْ سَالْ
قَاعدَه تِفَنِّنْ فى حِيلِة عَشَانْ تِمُصّ الغَلاَبِه
عمَّالَه تِشْرَبْ و تِسْكَرْ و تقول دَا كـُلـُّه عَالْ
******
حتّى "الحِدَادْ" المُجَامْلِهْ اسْتَخْسِرُوهْ فى النَّاس
مِش اللِّى عَنْدُه مُصِيبِهْ عَايِز تِحَاوْطُه نَاس؟
كُبَارَاتْنَا قَاعْدِينْ فى مَلْعَبْ و "الجِتَتْ" فى البَحْر
دا اللِّى اخْتَشُوا مَاتُوا و "مَبَآشْ" عَنْدِكُو إحْسَاسْ
******
يا مَصْر ويَّا "حِسِين" إِوعَاكِى تِنْسِى "صَبَاحْ"
أُم العِيَالْ و العِيَالْ رَحَلُوا و سَابُولُهْ جِرَاحْ
سَامِحْنَا يا سِى حِسين عَالِّلى حَصَلْ مِنِّه
فَجْأة قَلَبْنَا العَزَا صِوَانْ مَلاَنْ أفْرَاحْ
******
خَرَجْنَا سَاعِةْ "عِيَاطَك" نِرْقُصْ و نِرْفَعْ عَلَمْ
و نسِينَا حُزْنَكْ لِوَحْدَكْ وانتَ فى عِزْ الألَم
وهَتَفْنَا يِحْيَا الوَطَنْ اللِّى نِسِيكْ فى المِحَنْ
و "الحَاجِّه" مَاتِتْ بِحَسْرِةْ، اللِّى غِرِقْ و اتْظَلَمْ
******
"الباَخْرَه" واخْدَه شهَادَاتْ تِمْلاَ "تَمَنْ" جُدْرَانْ
بِإِن هِيِّه "البِرِيمُو" حَتَّى بِدُونْ قُبْطَانْ
وفى الأمَانْ و السَّلاَمِه، حَاجَه مَا حَصَلِتْشِى
سَهْلْ الوَرَقْ يِنْضِرِبْ، أصْلْ الضَّمِيرْ نَعْسَانْ
******
د. توفيق ماضى
أستاذ إدارة الأعمال بجامعة الإسكندرية "سابقا"
وبجامعة الكويت حاليا
mady@cba.edu.kw
المزيد
