" كُلْ سَلَـفْـكُوا دينْ" " كُلْ سَلَـفْـكُوا دينْ" د. توفيق ماضى ***** كُـنتُـوا فينْ يَاخـوَانَا يَاللِّـى بِـعِـدتُوا عَـنّا وِ اتـقْسَمنَا حَبِّـتينْ كُـنتُوا فينْ؟ ***** لَمَّا قُـولنَا الفِلْ خَانِّهْ وِانْتُـوا قُـلتُوا خُشُّوا جَـنِّهْ لاجل خَاطِرْ مَادتينْ كُـنتُوا فينْ؟ ***** لَمّا قَالُـوا مُشْ هَـنِعـزِلْ وِانْتُـوا قُـلْـتُوا مُشْ هَـنِنْزِلْ وِ احنَا ضِعنَا بينْ وِ بينْ كُـنتُوا فينْ؟ ***** لَمّا دَخُلُوا كُل طَايـفِهْ وِ بْمَهَارَهْ وِ كُلْ حِرْفِهْ قَسِّمُوهَا طَايفِتينْ كُـنتُوا فينْ؟ ***** لَمَّا سَرَقُوا الثّورَه مِنّا لَمَّا شَقُّـوا الصّفْ بينّا بَعدْ تَشبِيك الإيدينْ كُـنتُوا فينْ؟ ***** لَمَّا هَاجمُونَا وِ جُونَا عَـندْ مَاسبيرُو وِ دَاسُونَا لَـمّا نِرفَعْ يَافطِتينْ كُـنتُوا فينْ؟ ***** لَمّا دَم الشُّهَدَا هَانْ وِ اتخَنَقْـنَا فِى المِيدَانْ وِ اختَفَت نُورَه و حِسِينْ كُـنتُوا فينْ؟ ***** لَمّا عَرُّوا جِسمْ حُرمِهْ لَمّا قَـتَلُوا شِيخْ وِعُلَما وِ اتسَحَلْنَا مَرِّتينْ كُـنتُوا فينْ؟ ***** لَمَّا ضَرَبُوا النّارْ فِى رَاسِى وِانتُوا عينكُوا عَ الكَـرَاسِى يُومهَا صَابُوا أَلفْ عينْ كُـنتُوا فينْ؟ ***** لَمّا قَالُوا مَأجُورِينْ وِاللِّى مَاتُوا مُجْرِمِينْ أخُدُوا يُورُو وِ وَجْبِـتِـينْ كُـنتُوا فينْ؟ ***** لَمّا قُـلتُوا كِسِبتُوا غَـزوِهْ وِاللِّى ثَارُو عَمُلُوا نَزوِهْ لاجْل تَاخدُوا المَجلِسينْ كُـنتُوا فينْ؟ ***** لَمّا جَابُوا حكُومَه دَايـبِهْ وِاحنَا قُـولْـنَا حَاجَه خَايبِهْ وِانتُوا قُولْـتُوا شُورَهْ زينْ كُـنتُوا فينْ؟ ***** لَمّا كُل مَصرْ زِهقِتْ مِن عَمَايِلكُم وِ طِهْقِتْ وِانتُوا تِرغُوا بِكِلمِتِينْ كُـنتُوا فينْ؟ ***** لَمّا اخُويَا يِرُوح وِ يِهرَبْ لاجلْ يِـيجِى الفِلْ يِركَبْ يِـبقَى خَدنَا خَبطِـتينْ كُـنتُوا فينْ؟ ***** لَمّا تِيجُوا تِشكُوا مِنهُمْ أو تِـقُولُو كِلمَه عَنهُمْ يِبقَى كُلْ سَلَـفْـكُوا دينْ كُـنتُوا فينْ؟ ***** 11/4/2012   06/11/2014 مصرنا ©