رسالة من مواطن قرفان ............................................................... بقلم : محمد ابو سعده .......................... فاض بينا الكيل فعلا ملينا وزهقنا من كلامكم مثقفين سياسيين شعراء ناس كبيره  مش حاسيين ولا شكلهم عارفين يقولوا إيه  شكلهم فرحانين بمقالاتهم وكلماتهم إلي ذي الحجر وكمان مبسوطين بان الناس بتكلم عليهم عشان تفرحوا اكتر إحنا مش مبسوطين منكم خالص مش بنتباها بيكم افرحوا يلا سقفووا كمان مش دا إلي عايزينه انكم تكونوا مختلفين عنا انتم مصريين من نوع أخر أو شكلنا أحنا إلي مصريين من درجه سفلية لسا موصلنا لجنسيتكم الأولي المصرية  فكرتوني بالناس إلي عايشه في شبة الجزيرة العربية يقولوا علي مجموعه غير متحضرة بتعيش في الصحراء أنهم ( عقد )  والي عايشين في فلا بيسموهم ( حضر ) معاهم الجنسية الأولي يعني ... يجماعه والله زهقنا .. شكلكم متعرفوش إننا كلنا ولآد تسعه ولا إن بدايتنا التراب وأخرتنا التراب كلنا هنندفن ونموت مش هتاخد معاك حاجه عربيتك المرسيدس وتلفونك إلي فيه كمرا مش هتا خدهم معاك بعد ما تموت .. بعد الموت يا سيدي كلنا هنتحاسب كلنا هنتعزب ... دفاترك وحسناتك وسيئاتك هيا إلي هتخدها معاك  .. ممكن مستغربين إني بكلمكم وبكتبلكم ويمكن تقولي ولد تافه بسيط مش مثقف  لسا موصلش لمرحلتنا وهرد وأقول أنا فعلا كدا بس وأنا بكتبلكم  بكتب علي إني مصري وجنسيتي مصري ويوم لما جيت مصر وانا في المطار ضابط لابس ميري من كتر بصي  عليه ضحكلي وقالي انت فرحان باللبس قلتله اه عشان في سني الصغير أي واحد كان بيتمنا يكون عنده لبس ميري وقالي أنت مش ينفع تدخل كلية الشرطة لان أنت كنت عايش بره مصر  صدمي الأخ  وهو مش عارف علي العموم مش موضوعنا ... مشكلتنا انتم فين عننا وعن مصر يعني وصلتوا لحد فين مش كفاية لم فلوس وأنكم  ركبتوا جميع انواع الطائرات في سفركم .... روحتوا هنا وروحتوا هناك وبرضه منستوش مصر يمكن عشان مكتوب الجنسية مصري .. المشكلة بتبدا بأنكم حابين مصر وعايزين تكتبوا عنها .. بس شكلها العيون الزرقاء وكاسات البراندي والويسكي الي فيها زتون نستكم مصر شكلها الشوارع النظيفه والعربيات الكبيره نستكم مصر شكله برج إيفل والورد الأحمر والأصفر نساكم مصر .. هقول إيه ولا إيه .. علي العموم ابن البلد الأصيل عمره ما ينسا مصر ... والي خايف فعلا علي مصلحة ولآد بلده عمره ما هينسا مصر ...  كلامي لكل السياسيين وكل الي بيمسكوا قلم ومثقفين وعايشين بره مصر وكمان جوا مصر لحد أمتا نفضل ضد بعض . ؟  لحد أمتا نفضل انتووا في وادي وإحنا في وادي ؟    لحد أمتا .. لحد أمتا كل إلي هامكم تكتبوا وتقولوا وأصواتكم تعلا علينا أكننا إحنا عشان عايشين في مصر وراضين بهمها وذلها وعلي قلوبنا زى العسل شغالين عندكم وعند أقلامكم  وليه لاء منتم مثقفين وبتكتبوا وبتسافروا وعارفين الدنيا ماشيه أزاي .. كل همكم تكونوا ضد رئيسنا والراجل إلي بيعمل المستحيل عشان يحسن من عيشتنا صراحة يا رئيسنا يا مبارك مصر وتفضل تباركنا سيبك منهم يا ريس أنت أبونا الروحي كلنا ورآك  ولو هما مش يعدلوا نفسهم سيبهم يا ريس إحنا نعرف نعدلهم .. كثير شفت تطاولات كثير شفت أقلام بتكتب عقول متربيه علي الغالي عايشه علي فلوسها والفلوس الي ورثتها ومش هاممهم حد ويهمهم حد ليه وهما عندهم بيت وعندهم مكتب وكمبيوتر واكتب يا برنس ورينا تفاهاتك .. تحب تسمع صوتنا واحنا بتضحك علي كلامك تحب تسمع صرختنا وإحنا غضبانين علي أفكارك   ..          تحب تسمع إيه بس قولي وأنا أريحك هختصر أفكاري وأقول  مريت علي مجله الكترونية يتم نشرها من مكتب تابع للمركز الالكتروني وشفت فيها مقالات لناس كبيره جدا ثقافتها تعدت الحدود غصبن عني أنا الشاب التافه لابد أن احترمهم أولا لكبر سنهم وثانيا لاحترامهم لقلمهم وانه لازم يتكلم ويبوح ويكتب فيها الكاتب غريب المنسي  الدكتور احمد مطر إلي يحترمه وبقدره وبحترم مقالاته جدا ولما اشوف مقاله ليه فعلا غصبن عني لازم أكملها للأخر المفروض مكنتش قلت أسامي ولا أماكن عشان يكون كلامي عامه لان في فعلا ناس عايشه في مصر وبره مصر كتير أحب أوجه كلامي ليهم  عتابي ليهم لحد أمتا نفضل ضد مصر تحسوا بينا أمتا  انتووا عايشين ومستريحين وامنتوا مستقبلكم ومستقبل أولادكم مش بس كدا ومستقبل أولاد ..  أولادكم إحنا مش كدا إحنا لسا بنبدا طريقنا إحنا مصريين يا جماعه مصريين بنصحا الصبح نغسل وشنا ولو في فلوس هنفطر فول وطعميه ولو مفيش هنستنا الغداء ونصبر نفسنا بكباي شائ إحنا مش زيكم انتووا تفطروا توست وبآتيه وجبه رومي وبتتغدوا بانيه وخضره طازه ومش عارف في عشاكم بيكون موجود البراندي والويسكي ولا لاء عشان منظلمش حد .. صراحة قرأت كنير ولفيت لفه كدا علي المقالات الي موجوده في حياتنا دلوقتي ... كلهم ضد مصر وكلهم ضد حكام مصر .. اصححلكم المعلومة إحنا مع مصر ومع حكومة مصر ومش ممكن كلامكم يقدر يغيرنا لان إحنا مصريين .. بيكلمونا عن سياسة الانهزام وأنا هرد عليهم واحب اسمع رائيهم وأحب اسمع رائ دكتور مطر .. تعرفوا لو حد عايز يخليني منهزم أو يطبق عليا سياسة الانهزام إلي بتقولوا عليها  هروح اشتري مسدس صوت من أي محل وبي 100 جنيه احضره (( أخليه حقيقي )) وطلقه واحده وأريح نفسي ولا أقولك خسارة إني اصرف فلوسي عليه أخره سكينه معفنة من بتاعت المطبخ ونستريح ها كدا إحنا منهزمين ؟ علي العموم ماشي عشان متقولوش إني رامبوا العرب بس قريت كمان إن موضوع الانهزامية دخل في المطارات .. يعني ايه دخل السياسة في مطارات العالم  ..أصلا  40 مليون من أصل 80 مليون في مصر ملهمش صله بالمطارات ..  يا سلام سياسة دوله بقت ببتقايم بالمولات التجارية ومطاعم كنتاكي وماكدونلز وإنهم نضاف وكدا ..  بقالي كنير بسافر رايح  جي علي مطار القاهرة وعمري ما فكرت لما أروح أعطي صوتي في الانتخابات أقول إلي عملي مطار حلو اديله صوتي .. نو واي أقارن صوتي بالمطارات يا بهوات .. بيقولك مطار دولة يستوعب 50 مليون شخص ومطار دوله ثانيه يستوعب  100 مليون شخص واعتقد الدول دي فهاش سياحة زى  مصر والي يثبت كدا إن أعداد المسافرين والسياح إلي تستقبلها مطارات مصر فوق العشرين مليون .. قولولي بئا الدول إلي صارفه علي مطاراتها  عندها الأرقام دي في سنه واحده .. وكمان قلتوا مصر مش معمره و 4% بس فيها إلي الناس عايشه فيه .. كويس والله أنكم منستوش لسا ارض مصر وعار فينها وعارفين مساحتها ولسا حاسيين بالناس إلي فيها .. انتووا فين يعني من الموضوع ذا .. ولا إحنا بس إلي نتشتم وإحنا إلي نتعذب وإحنا إلي نقرا وإحنا إلي لازم نعمر ولا الحكومة تعمل إيه .. ما تجمعوا نفسيكم كدا علماء سياسيين شعراء كل واحد يطلعله مليون واعملوا شركة أعمار وامسكوا محافظه محافظه وعمروها قرية قرية وساعدوا الناس والجهل الي فيها وبكدا والله تكسبونا هتكسبوا فلوس كتير طبعا والي أهم من كدا محبة الناس ليكم  بس نعملكم إيه انتووا كروشكم مش بتشبع من لم الفلوس  .. دخلتونا كمان في موضوع إن الجرائم زادت وحالات النصب والانتحار زادت وردي عليكم مش مكسوفين وانتووا بتقولوا كدا .. مش عارفين انه العيب عليكم .. انتووا السبب في كل دا .. بالعربي عشان تفهموا انتووا إلي سبتوا مصر وسافرتوا عملتوا فلوس هناك وفلل ومشاريع وسبتونا كدا .. سبتوا أخواتكم المصرين إلي محتاجين أقلامكم وأفكاركم وكمان فلوسكم .. محتاجينكم تنورونا هنا .. محتاجين تجمعونا وتكلمونا وتنوروا عقولنا وتعرفونا الناس عايشه بره أزاي  وتعرفونا كمان الاعتدال .. بس بدال كل دا انتووا ثبتونا وسبتوا مصر وخليتوا اصحاب العقول التافهة والحراميه وتجار المخدرات يخدوا وضعهم في البلد..  وجيين تقولولي انهزاميه وتطوير لمصر وانتم سبب كل حاجه .. ولا الشاعر إلي فاكر نفسه شاعر واعد يكتب ويقول ويعيب علي دا ويشتم دا ويكلم الريس بطريقه بنسميها بيئيه يستخدمها تجار المخدرات والزلنطحيه في البلد .. لا ومبسوط وهوا بيشتم اهل مصر وبيقولهم البتاع ومش البتاع (( لا فعلا انا مبسوط منك )) .. تعرف هخلي عيالي لما اكبر وأتجوز يقروا شعرك ... يخي ملعون نفسك علي شعرك .. مبسوط من نفسك .. أنت وكلماتك إلي توصفك .. يلا مش مشكله منت لاقي ذماره لابسه قصير جنبك تمجدك .. يخي ملعون نفسك علي شعرك .. بدال ما تكتب وتحسن كلماتك عشان نفتخر بيك بعد كدا اعد تشتمتنا وتشتم حكومتنا وشعبنا .. البيه مش عجبه المكروباص والأتوبيسات عشان هوا راكب عربيه (( الله يرحم ابوك لما كان بيدلدل رجليه وهوا راكب الحمار )) .  دخلونا كمان في الحكومة والشرطة  وغلطوا فيهم من غير سبب لحد أمتا يعني هنسكت وانتو بتغلطوا في حكومتنا وضباط شرطتنا الي ماسكين البلد ؟؟ هرد عليكم وأقولكم إن مشكلة  الشعب أنه بدا يكره الحكومة كل دا منكم من كلامك وإشاعاتكم الي بطلعها أقلامكم إلي عامله زي الرصاص بتدخل عقول الناس البسطاء في مصر ... يجماعه الحكومة بتاعتنا الشرطة عيالنا .. الي فيها بيدخلوا كلية الشرطة بعد اختبارات ويعدوا يطلع ميتينهم اربع سنين لحد ما يتخرجوا دارسين ومتعلمين وعارفين الوضع ماشي أزاي محتاجين بس إننا نحترمهم ونقدرهم ونسامحهم علي شغلهم ومرمطتهم في الشوارع عشان إحنا ننام في بيتنا مستريحين يعني هحكيلكم علي قصه صغيره حصلت قدامي .. ضابط شرطه عامل كمين عشان يمسك تاجر مخدرات كان الكلام كتير عليه قريب وانه مشغل صبيان تحتية كثير يبيعوا للعاطل والباطل حتا يبيعوا للأطفال الي معدو 14 سنه المهم بالصدفة اعد علي قهوة ويدخل تاجر المخدرات سوبر ماركت قريب تقوم جيه عربيه فيها الضابط ومخبريه ويمسكوا الحقير تاجر المخدرات .. تقوم النخوة وشهامة ولآد البلد عايزه تمنع الضابط يعمل كدا رد الضابط كان مقنع وبسيط في نفس الوقت قالهم يا جماعه أنا بمسك تاجر مخدرات مش دكتور ولا إنسان محترم .. علي العموم ندخل ليه لتاجر مخدرات يلعن أبوه لأهله كلهم مهوا الي بيخرب في بلدنا ... واشكر في مقالي الي عمل اسبوع الشباب والشرطه نقف جنب بعض فعلا نقف مع بعض عشان مصر حبيبتنا ..   فين الانهزامية في كدا يا حضارات يا كبار يا مثقفين .. صراحة مستغرب جدا من كلامك ومقالاتكم الي خلتني اهتبل وأدور في متاهة مش عارف أخرها  ولا عارف اخرج منها هما عايشين في أمريكا وباريس ولندن وبلجيكا وألمانيا ودول بعيده تماما عن مصر وبيعبوا علي مصر مخلوش حاجه فيها اله لما طلعوها وحشه دا حتى الفول إلي هوا نعمة ربنا عيبوا عليه  ,,  لا والي يقهرك أنهم يقولوا مصريين ومبسوطين من كدا ..   ((  فعلا إحنا مبسوطين منكم ))  يا جماعه إحنا مصريين  ومصر بنحبها الي بيشتغل زبال اهو بيساعد في نظافة مصر  والي اعد علي مكتب  اهو بيمشي امور مصر والي طالب اهو بيروح مدرسته او جامعته عشان يقدر يكبر ويعمل حاجه لمصر.. الطفل تقوله تحب تكون ايه يقولك دكتور او ضابط مش مشكله يكون ايه اهم حاجه اننا عارفين ان نيته انه يعمل حاجه حلوه لبلده بيقولوا في مسابقات شغل كل العاطلين بيروحوا يقدموا ونفسهم اسمهم يطلع ويبقالهم شغل .. فين بئا الانهزام  والله وما ليكم عليا حلفان انتو الي منهزمين انتووا الي سبتوا مصر ومشيتوا وخدتكم مننا العربيات الجامده وموديل السنة والشقق والمكاتب العالية انتووا إلي بعتونا .. انتووا اعتبرتوا نفسكم مصريين من نوع أخر .. وإحنا.إحنا فقراء يا سيدي إحنا بنصحا الصبح نحلب الجاموسة ونحش البرسيم عشان حضرتكم ..  إحنا بنساعد في تطوير مصر عشان حضرتكم تتباهوا بأنكم مصريين .. إحنا يا سيدي بنفطر الصبح علي عربية الفول ونركب الأتوبيس عشان نروح شغلنا ولو الأتوبيس زحمه نشوف مكروباص ولو برضه زحمه نجمع نفسنا ونقسم فلوس التاكسي  .. يعم مش قلتلك إحنا مصريين رسالتي موجهه لكل إنسان يتحدانا بمصر .. لكل إنسان نفسه مصر تكون جنه.. بقوله إحنا محتاجينك وسطينا محتاجين تكون معانا .. نكلمك وتكلمنا .. مش تكون ضدنا وضد الناس إلي بنحبها .. مش تعيب علي رزقنا وعيشتنا وأكلنا .. مهو إلي أداك بكره يدينا ..   فعلا مصر محتاجه كل مثقفيها كل عقولها الكبيرة المدبرة .. محتاجه وقفه كبيره ونحط أيدنا في أيد بعض مش مهم بئا دكتور أو عاطل أو شاب أو ا طفل أو عجوز ولا من أسكندريه او القاهرة أو وجه بحري أو وجه قبلي المهم إحنا مصريين كلنا نكون أيد واحده ونحاول نعمل حاجه مع بعض عشان نخليها جنه مصر محتجاكم يا جماعه .. محتجاكم يا دكاتره ... محتجاكم يا مثقفين .. محتجاكم يا سياسيين .. محتجاكم يا مدرسين ... محتجاكم يا عمال وفلاحين ..  محتجاكم يا زبالين. واعذروني علي كلماتي ألهبله وعبطي وغلطاتي في الكتابة لأني مش مثقف وموصلتش لسا لمكانتكم    مصرنا ©
	.....................................................................................