ولسه ما خلصش الكلام ............................................................... أحلى تعسيلة شعر: مصطفى بلح ولسه ما خلصش الكلام قالوا بدل الباب هنفتح ألف باب من عمالة ومن وظايف ولسه إسكان الشباب قالوا هنشغل ولادنا ومش هنسمح باغتراب قالوا اهوه هنقوم نحقق والمصيبة شبابنا صدق وابتدى ينسى اللى راح ابتدى ينسى الجراح ينسى ألوان العذاب وابتدى يحلم بوعد ابتدى يحلم بجد من زمان والحلم غاب واما فاق من حلمه راح بيفتح أى باب ما التقاش غير الكلاب أو ديابه بألف ناب كسروا فينا كل حلم قتلوا فينا كل علم حطوا راسنا فى التراب خلوا روسنا روس نعام ولسه ماخلصش الكلام من وزارة لميت وزارة مش قرار لأ ميت قرار دا بيكدب دا بيشجب دا يهدد بانهيار دا يوافق دا ينافق دا يقول لأ لأ هزار دا معاهم دا عليهم طب وإيه أخر الحصار كل حاكم كل ظالم باع خلاص مصر الفتية باع خلاص مصر الأبية باع حياتنا وأمنياتنا بالتراب باع القضية خرجوا لينا بألف وش والكلام بقى كله غش هو أصلاً فى قضية من نظام لنظام بنمشى مكسورين مذلولين أو متهانين هو أصلاً فى نظام ولسه ماخلصش الكلام قالوا بنطبق شريعة لأ بجد مش خديعة أوعى تسمع حد تانى يبقى بيدبر وقيعة طب قولولنا فين يا ساده والفساد زلزال يرج هما قالوا طبقوها بس نسيوا طبقوها فـ أى درج طب هقولك كلمتين ليك يا ريس رأى زين لو بتقطع إيد وخانت حد هيفكر يخون لو بترجم زانى محصن كله هيصون العيون ليه تطبق ميت قانون ع الغلابة بألف لون وع الديابة فـ كل غابة مش بيطبق قانون هو ده عدل وعدالة ولا ده ظلم وظلام ولسه ماخلصش الكلام قالوا عصر الانفتاح يعنى حريه وبراح قلت وضحكت انفتاح انفتاح إيه دول جابوا داغنا واللى فتحوها دماغنا شرطة تضرب بس فينا مش معانا لأ علينا يدهسوا دارك ودارنا أى خدمة دا شعارنا واما قلنا صدقوهم نبتدى وننسى اللى فات قالوا برضه إضربوهم وابتدى ضرب البنات دا شعارنا الضرب ليكم والإهانه والمهانه واما أشكى وأقول حرام أبقى موصوف بالخيانة هو ده ما بقاش حرام ولسه ما خلصش الكلام قالوا هنقول كل حاجة وبصراحة وبوضوح واللى عايز أى حاجة يجى يتكلم يبوح جيت لقيت الكل ساكت قلت أتكلم أنا قلت هنصلح ونبنى قالوا ده يوم المنى إحنا طبقنا كلامكم وفى نظامكم ميت سنة فيها إيه لو تسمعونى جربونى ولو سنة قالوا بتقول إيه يا حقير يا غفير يا ابن الغفير دا المدير يولد مدير والوزير يولد وزير هما عايزينها وراثة فى انتخابات الرئاسة هى ناقصة يا ربى كوسه ولا ناقصة إنتكاسه ليك يا ربى شكيت همومى ربما تفك اللجام ولسه ماخلصش الكلام نيجى لخيار السلام اللى خلانا حمام ضرب جاى من كل حته واحنا موتى أو نيام للعدو أو للكلاب نرفع الغصن الزيتونى وابقى وحش مع ابن بلدى اللى لونه هو لونى ماشى مش هسمع كلامكم ما انتو ما سمعتوش كلامى تانى مش همشى فى نظامكم هحلم ان افرض نظامى ماشى مش محتاج سلامكم دا نتو زودتم آلامى دا انتو كسرتم حسامى م النهارده مافيش كلام هبتدى أحلم وانام فى انتظار المطره تنزل بعدها يمشى الغيام ولسه برضه فى كلام لسه ماخلصش الكلام   06/11/2014 مصرنا ©
	.....................................................................................