"نهون" .. "نهين" : قصة شاهد ما يعرفش حاجة بقلم : معتز شكري ..................... ملحوظة مهمة : هذه الأقصوصة محض خيال ولا علاقة لها بأي أشخاص أو أحداث في أرض الواقع ، والكاتب يعلن مسبقا أن الجبن في هذا الزمان سيد الأخلاق. نهون ؟ نهين في زمان سحيق .. ومكان عميق .. يحكى أن هذه القصة الطريفة والواقعة اللطيفة قد حدثت وقائعها ، وعاشت بدائعها ، ولا تزال تضرب مضرب الأمثال ، وتنتقل من مقال إلى موال ، في فصاحة الشهود وحفظ العهود والجودة من الموجود.. صلوا على سيد الأنام .. ووحدوا اللي ما يغفل ولا ينام. قال الراوي يا سادة يا كرام : حضر شيخ الخفر أمام المحقق للإدلاء بشهادته في مقتل الأنفار الذين انتفضوا للحصول على حقوقهم المهضومة ، وكان مصيرهم القتل بالرصاص. المحقق : بعد تسجيل بيانات الشاهد واسمه وسنه وعنوانه ، سألناه : سين : تعرف إيه عن مقتل الأنفار في القرية ؟ جيم : نهون سين : يعني إيه ؟ جيم : أعرف إنهم بيقولوا كده والله أعلم اسم الله على مقام حضرة جنابك إنهم زي ما تقول سعادتك كده فيصوا سين : يعني إيه فيصوا خليك محدد جيم : يعني اتكلوا سين : تقصد ماتوا جيم : اسم الله على حضرة جنابك .. حاجة زي كده سين : يعني ماتوا موتة ربنا ولا حد قتلهم ؟ جيم : يعلم ذلك سبحانه اللي ما يغفل ولا ينام سين : أيوه يعني انت معلوماتك ايه ؟ جيم : معلوماتي انهم لا مؤاخذة فيصوا سين : يعني ايه ؟ جيم : يعني اتكلوا سين : هل سمعت ضرب رصاص في هذا اليوم ؟ جيم : نهين سين : مش فاهم جيم : يا بيه عادي يعني الرصاص في كل مكان اليومين دول سين : خليك محدد .. سمعت ولا لأ ؟ جيم : سمعت ناس بيقولوا إن فيه ناس قالوا إن ناس سمعوا سين : الخفر اللي تحت رياستك ضربوا حد بالرصاص ؟ جيم : نهون سين : يعني ايه ؟ جيم : أبدا يا باشا سين : العمدة أمرك أن الخفر يضربوا الأنفار بالرصاص ؟ جيم : معنديش علم سين : إزاي ما عندكش علم ؟ إما أنه امرك أو لم يأمرك جيم : نهين سين : يعني ايه ؟ جيم : العمدة راجل طيب مش ممكن تطلع منه العيبة سين : يعني ما أمرش ؟ جيم : لأ .. ما أمرش سين : أنت أمرت بضرب النار ؟ جيم : لا يا بيه .. عمري ما أمرت بحاجة زي كده سين : طيب الخفر ممكن يضربوا من نفسهم من غير أوامر ؟ جيم : ما افتكرش سين : تفتكر فيه حد غريب دخل القرية وضرب الناس دي بالرصاص ؟ جيم : يمكن يا بيه .. ما اعرفش سين : ولو فيه حد غريب ممكن أنت والعمدة ما تعرفوش ؟ جيم : نهون سين : مش فاهم جيم : كل شيء ممكن يا باشا .. ماعنديش معلومات سين : يعني عايز تقول أن الناس دي اتقتلت لوحدها من غير ما حد يقتلها ؟ جيم : نهين سين : رجعنا تاني ل .. نهون .. نهين .. وضح كلامك جيم : مش يمكن يا بيه مثلا يكونوا اسم النبي حارسك وصاينك كده اتقهروا في نفسهم يا كبد امهم وقتلوا روحهم ؟ سين : تقصد يعني انتحروا جيم : نهون سين : يعني ايه ؟ جيم : يا بيه انا باقول مثلا يعني باحاول اساعد سعادتك في حل القضية .. لكن انا يا بيه لا شفت ولا سمعت سين : يا بني آدم .. الطب الشرعي أكد أنهم اتقتلوا بالرصاص بفعل فاعل مش انتحار جيم : نهين سين : تاني ؟ جيم : يا بيه أقصد يعني الطب الشرعي أدرى .. هو أنا هاعرف زي اسم الله على حضرة جنابك الطب الشرعي.. كفايه أنه شرعي يا بيه سين : تتهم حد من جوه القرية ؟ جيم : نهون سين : يعني ايه ؟ جيم : لا يا بيه الظلم حرام معنديش معلومات سين : تتهم حد من بره القرية ؟ جيم : نهين سين : يعني ايه ؟ جيم : ماعرفش يا بيه يمكن .. بس معنديش معلومات سين : انت يا راجل حلفت في أول الشهادة ولا لأ ؟ جيم : حلفت على إيه يا بيه .. هو أنا بيني وبين سعادتك حلفانات لا سمح الله ؟ سين : الحقيقة أنا نفسي نسيت .. مع أنها أول مرة تحصل .. يا حضرة المساعد : الشاهد أقسم اليمين في البداية ولا لأ ؟ المساعد : نهون سين : يا حضرة كاتب التحقيق : الشاهد أقسم اليمين ؟ الكاتب : نهين الشاهد : طب يا أفندم أمشي سعادتك ولا هاتعيد استجوابي ؟ المحقق : نهون نهين نهوننا ننا هوه هن هن وهنا أدرك بنت اللذينا الصباح فسكتت عن الكلام المباح واتضح أن الكلام كله سداح مداح وكل سنة ودوار حبيبي براح   06/11/2014 مصرنا ©