آه من الهدايا
...............................................................
 | |
عيد ميلاد بنت سعيد | |
بقلم د. محسن الصفار
.........................
دخل سعيد إلى شقته المتواضعة حيث يعيش هو و زوجته و أولادهما الثلاثة وتعجب لرؤية البيت مزينا وفيه أنواع الزهور وطاولة الطعام في وسط الغرفة وعليها صحون وملاعق وكل الدلائل الميدانية تشير إلى وجود غزو أقصد حفلة قريبة في بيته , سلم على زوجته وسألها :
- شو حبيبتي خير ؟ شكلها فيه حفلة اليوم ؟
- أيه أكيد فيه حفلة لكان شايفني مزينة الشقة هيك كرمال الدوري الانجليزي لكرة القدم؟
- وشو مناسبة الحفلة ؟
- شو بك نسيت أن اليوم عيد ميلاد بنتك ؟
ضرب سعيد على جبينه وقال :
- الله يلعنك يا شيطان والله نسيت ليش الحياة ومشاكلها تخلي الواحد يتذكر شي ؟المهم مين جاي ؟
- ما حدا رفقاتها بالمدرسة مع أهلهن
- الله يعين , بلغتيهن أنا ما نقبل هدايا من حدا ؟
- أيه والله باستحي أبن عمي يعني مو حلوة أقول للناس مابدنا من حدا هدية
- وليش تستحي ؟
- يقولو أن نحنا بنقول هيك لأن بدنا هدية محرزة وغالية بتعرف الناس كيف بتفكر
- سبحان الله أنا مابدي هدية يقومو يجيبو هدية غالية ؟
- يعني الناس هيك بتفكر
- أمري لله بس يكون بعلمك انتي بتتحملي المسؤولية أنا ما خصني
- أن شاء الله خير أبن عمي ما راح يصير شي
بدات حفلة عيد الميلاد وكل عائلة تدخل وبيدها هدية ولاحظ سعيد أن زوجته تراقب كل هدية كي تسجل في ذهنها من جلب ماذا وبعد الحفلة أسرعت بتسجيل كل الهدايا وأسم العائلة التي جلبتها وكذلك القيمة التخمينية للهدية ضحك سعيد وقال :
- شو يا حبيبتي عم تحسبي قديه بدك تدفعي ضرايب على الهدايا ؟ شو ها اللوائح اللي عم تعمليها ؟
- أي ضرايب يا سعيد ؟ لازم نعرف قيمة كل هدية
- ليش بدك تبيعهن ؟
- لا بس لازم نعرف كرمال أذا اللي جابها صار عنده مناسبة نجيب لهن شغلة بنفس القيمة أحلى ما يزعلوا
- حلوة هاي شو رأيك نوظف محاسب لهالشي ؟
- سعيد حاجتك تناقرني وقوم ساعدني بالهدايا
نهض سعيد وساعد زوجته بأعداد لائحة الهدايا دون أقتناع , بعد عدة أيام خاطبته زوجته قائلة :
- سعيد بدي 5000 ليرة
- خير لشو ؟
- عيد ميلاد صديقتها لبنتك بعد يومين ولازم نجيب لها هدية
- وليش لازم تكون الهدية بخمس ألاف ليرة شو بدنا نخطبها ؟
- لان أهلها جابو لبنتك بعيد ميلادها سوار ذهب حقه على الأقل 5 ألاف ليرة
- أيه بسيطة رديه لهن السوار ونصير خالصين
- شو هالحكي يا سعيد بدك تجنني ؟ خلاص لازم نجيب هدية ب خمس ألاف
- يا حبيبتي أنا راتبي كله 10 ألاف أذا أعطيتك منن 5 ألاف للهدية بشو بدنا نعيش ؟ نبطل نأكل ولا ما ندفع إيجار البيت ؟
- أيه شو بدي أعمل ؟ والله عيبة كبيرة بحقنا ما نرد الهدية الناس تقول علينا بلا ذوق الله يخليك دبر حالك بأى شكل
- أدبر حالي ؟ ليش هو أنا اللي ورطت نفسي بهالشي ؟ قلتلك ما بدنا هدايا
- خلاص روح خد لك سلفة من شي مطرح
- من وين بدي أتسلف ؟ أي والله البنك الوحيد اللي ما أخذت منه قرض هو بنك الدم !!
- دبر حالك هاي بنتك وقيمتها من قيمتك
- أحسن شي خدي هدية رفيقتها وبيعيها وأشتري هدية الها بالمصاري
- يا عيب الشوم أبيع الهدية ؟ وأذا سألوا عنها شو بدي قللن ؟ بعناها ؟
ذهب سعيد وأقترض المبلغ من أحد أصدقاءه وأعطاه لزوجته كي تشتري الهدية ولكنه فوجئ بعد عدة أيام بأن زوجته تطلب 3000 ليرة أخرى منه
- لشو بدك المصاري ؟
- والله واحدة ثانية من رفيقات بنتك صار عيد ميلادها وبدنا نجيب هدية !!
- أنتي جنيتي ؟؟ شو بدي كل يوم أجيب هدية بخمس ألاف وثلاث ألاف ؟ شايفتني مليونير و مو عارف وين أودي المصاري ؟
- أيه شو بدنا نعمل ؟ شو العمل ؟ ما فينا ما نرد هدايا الناس
- مافينا نرد الهدايا بس فينا نفوت على الحبس بسبب الديون ؟ سبحان الله !! شو عاملينها بورصة تبادل الأسهم ؟ والبورصات فلست كمان !!
وفجاة سكت سعيد وكان فكرة قد خطرت على باله وعاد إلى الواقع على صوت زوجته :
- دبرني شو بدك تعمل ؟
- هلق بتشوفي
خرج سعيد من البيت وعاد ومعه علبة كبيرة مغلفة بشكل جميل ,تعجبت زوجته وقالت :
- شو هالهدية شكلها غالية ومحرزة ؟ أكيد كلفت كثير
- لا 50 ليرة علبة شوكولاتة و50 ليرة تغليف
- شو 50 ليرة ؟؟؟؟ كيف بدنا نعطي البنت هدية بخمسين ليرة وأهلها جايبيين هدية بثلاث ألاف؟
- لا فيها رسالة بداخلها
- رسالة شو ؟
- يؤسفنا أن نبلغكم بأن القيمة السوقية لهديتكم في بورصة الهدايا والتي كانت 3000 ليرة قد أنهارت بسبب الأزمة العالمية مثلها مثل بقية البورصات العربية وعليه فأن هديتكم تعادل علبة الشوكولاتة هذه مثل ما أصبحت أسهم الشركات لا تساوي الورق الذى طبعت عليه !!
وكل هدية وأنتم بخير
