اعلانات حظوظ الدنيا اعلانات !!
...............................................................
بقلم د. محسن الصفار
..........................
 | |
اعلانات حظوظ الدنيا اعلانات !! | |
في شركة إعلانات ضخمة جلس المدير الجديد في وسط غرفة الاجتماعات وحواليه الموظفين المختصين بتصميم وصناعة الاعلانات لزبائن الشركة المختلفين كان الجميع قلقاً وينتظر دوره كي يقوم بعرض أفكاره ويتأمل في أن يوافق المدير عليها.
كان صاحبنا سعيد أول من وقع عليه الاختيار كي يعرض أفكاره الاعلانية فنهض وقال:
- سيادة المدير حضرات الزملاء فكرتي هي لإعلان الزبادي الجديد الفكرة إن احنا نجيب طفل بياكل زبادي ويشوف طفل تاني فقير بيبص عليه يروح الطفل جايب زبادي من أمه ويديه للطفل التاني ويعقدوا ياكلوا همه الاتنين إيه رأيك يا افندم؟
- إيه الكلام الفاضي ده؟ طفل إيه ويعقدوا ياكلوا إيه؟ هو إعلان وإلا فيلم فاتن حمامة؟ حد عنده فكرة أحسن؟
قفز أحد زملاء سعيد فوراً وقال:
- يا افندم الموضة دلوقتي موضة الاكشن احنا نجيب العيّل ونعمله زي جمس بوند ونخلي أبوه شايل الزبادي والولد يعمل كمين ويضربه ويوقعه لحد ما يخد منه الزبادي.
صفق المدير وقال:
- عظيم عظيم أدي الأفكار وإلا بلاش يا عيني عليك.
اعترض سعيد وقال:
- بس يا افندم ده أولاً قلة أدب إن الولد بيضرب أبوه وبعدين إحنا بكده بنشجع العنف في المجتمع يا افندم واحنا مش ناقصين بصراحة.
- انت بتشتغل في شركة إعلانات وإلا مصلح إجتماعي؟ مالنا احنا ومال الأخلاق والعنف احنا كل اللي يهمنا نبيع أكثر فاهم؟ إيه الموضوع اللي بعده خلصني.
- إعلان السيراميك يا افندم احنا نرسم بالجرافيك البناء الفرعوني ونستمر فيه لحد ما نوصل للوقت الحاضر ونخلّي المشاهد يعرف إن عراقة السيراميك ده ترجع لعصر الفراعنة.
- بايخ يا سعيد الله يخرب بيتك حد تاني عنده فكرة للموضوع ده ؟.
نهضت زميلة أخرى لسعيد وقالت:
- يا افندم النهارده مهند ونور مكسرين الدنيا وكل الجرايد والمجلات بتكتب عنهم إيه رأي سعادتك نجيب الممثل التركي (مهند) ونخليه يقول جملة وحدة في الإعلان وانت تشوف الستات حيكسروا السيراميك بتاع بيوتهم علشان يرجع يحطو من السيراميك بتاع مهند.
- يا عيني عظمة على عظمة يا ست انت أم كلثوم الاعلانات يا آنسة هي دي الأفكار والا بلاش مش تقولي فراعنة!! فراعنة مين يا عم؟ احنا في عصر مهند ونور واوباما مش تقول فراعنة. إيه الموضوع اللي بعده؟
- إعلانات المدينة الجديدة يا افندم أنا كان رأيي اننا نخلي الجيل الشاب يفهم إن بالجد والاجتهاد والعمل المتواصل حيقدر يوصل أنه يشتري بيت لعيلته في المدينة دي وبكده المشروع يحقق شعبية بين الشباب.
- شباب مين دول اللي حيشتروا بيوت في المدينة دي؟ انت أهبل يا ابني؟ الشاب لو اشتغل طول حياته وحوّش كل معاشه مش حيجيب الحمام بتاع البيت ده!! دي بيوت معمولة علشان الناس الهاي الفوق فوق خالص. يا شباب حد عنده فكرة للموضوع ده؟ خلي سعيد افندي يتعلم منكم.
نهض أحد الشباب وقال:
- احنا يا افندم نركز على الحاجات الترفيهية في المدينة يعني واحدة بنت حلوة أجنبية تنط في البيسين .
- حلو شايف يا سعيد؟ بنت حلوة تنط في البيسين مش الشباب بتوعك اللي عمرهم ما شافوا غير الترعة كمل يا ابني.
- آه وبعدين تقول أنا ما أقدرش آخذ حريتي في مصر غير في المدينة دي.
- يا عيني يا سلام هو ده الكلام والله الخواجات دول غلابة ومساكين مش قادرين ياخدوا حريتهم في البلد خالص قد ما الشعب بيعكنن عليهم لاقادرين يلبسوا ولا قادرين يقلعوا !!.
اعترض سعيد وقال:
- نعكنن عليهم إيه يا افندم؟ ماهم واخدين البلد بالطول والعرض وكلهم جايين من بلدان فقيرة في أوروبا الشرقية ومش لاقيين ياكلوا في بلدهم ويجوا عندنا هنا يعملوا فيها لوردات وأشراف ونبلاء وبعدين إيه فايدة السياحة إذا ما كانش المواطن يستفيد منها بشكل مباشر؟ البياع والمطعم والتاكسي وكل دول، حنجيب السواح نحطهم في مدن مغلقة لحد ما يمشوا؟ ده كلام غير منطقي ؟.
قاطعه المدير بغضب:
- انت اللي مش منطقي يا افندي انت شكلك غاوي شحاتة إيه رأيك نعمل إعلان للشحاتين؟.
- والله فكرة يا افندم وحيكون اعلان سياحي بالشكل ده:
واحد راجل بيزق عربيته المهكعة تحت الشمس ويقول انا ما احبش العربيات الجديدة علشان عربيتي بتساعدني اني أخفف وزني ويروح مغمى عليه !!!.
وواحدة ست ماشية وكل ما راجل يعدي من جنبها ويشم ريحتها يغمى عليه وتروح قايلة أنا فرحانة ان المية مقطوعة علشان ريحتي تخليني أحس الرجاّلة كلها بيغمى عليها من جمالي !!!.
ولاد شعرهم واقف زي القنفذ مش لاقيين ميه في الحنفية علشان يستحموا بيبصوا من شباك البناية على فيلا والولاد بيسبحوا في البيسين ويقولو احنا ما نبحبش الميه علشان بتتلف تسريحتنا !!!
وفي الآخر ييجوا كلهم مع بعض ويقولو للسواح ( نورت مصر البيت بيتك واحنا سايبين البيت وماشيين) .
عجبك ياافندم ؟
وكل اعلان وانتم بخير
06/11/2014
