مش ناوي ألومك ............................................................... حسين راشد ................... مش ناوي ألومك ولا أفتح بيبان العتب مَنا أصلي عارف و مقدر قوي كل اللي طالك م العطب يمكن أفضفض وتزيد بجاحتي حبتين مش ناوي أطبطب دا معدش في عمري أيدين ولا عُت بشعر أن ليكي في قلبي دين شوفتي المصيبة؟!! ما انتي لسه تايهه برضوا أيوه عايشة في عز فُجره مدبوحة لكن لسه فاكره أن السنين هترجعك و أن اللي سبتيهم يموتوا في بحر حبك جوا سينا .. لجل عرضك و انت ظنك تيجي أرواحهم عشانك تنفعك ما انتي بيعتي دمهم .. من غير تمن ما انتي خليتي عزيزك ينعدم و القضية اللي انتي ياما كنتي تحيينا عشانها سبتيها للملاعين بخطرك سبتيها للي ما يعرفوا غير بس سَبّك وفاكرة أن الدفا اللي كان في حضنك ممكن يهز الوجود ؟!! وإزاي وكونك اتملا بالسفاحين الشررين اللي تاجروا بكل دين اللي خلوا الفلاحين عطلانين و اللي خلوا مُعلمينك كما التلامذة الخيبانين قدام سعادة الكدر الأخبر وأما جت سفينة الموت ما قدرتيش تقوي ف عزمهم وقلتي موتهم كان مقدر و انتشر خبث التعالب جوا روح الملعونين بين كل بين وبين وبين و اما أحاول مره أني ألملم الحلم القديم ألقى نبض الحلم واقف بين طابور الشحاتين لجل لقمة ولا هدمه يستروا عُري الضمير حتى ضي الأمنيات جه نهشها المفضوحين وانتي واقفه لابسه قالعه .. قالعه لابسه ما بتختشيش بتاخدي فيا العزا متبسمه و بتسألي بمألسه أنت .. مين ؟!! كان سهل قوي أني أسيبك .. أو أبيعك للي ما بيرحم ولا تصعب عليه زي ما انتي بيعتي فيا ألف مرة للعته .. والنخاسين بس ما قدرتش عشانك أيوه ما عرفتش ألين ما انتي غارسه جوا مني جين كرامة المنصورين ف ليه هلومك و ليه افتح بيبان العتب من أصله و العتب هيكون لمين ولا مين ولا مين اسمحيلي اني اعاتب روحي و ابهدل كل احلامي اللي ماتت اسمحيلي ألعن اليوم اللي مقدرتش أطوله و أخرجه من رحمة العقل السليم اسمحيلي اشيل العتب والطين فوق دماغ المبطوحين اسمحيلي الم روحي و اطوف كما البهلول فرحان حزين ما انتي لسه بتسألي وعنيكي ليا مفنجلين هوا أنت مين ؟!!!   مصرنا ©
	.....................................................................................