الحكومه الإلكترونيه
...............................................................
| |
الحكومه الإلكترونيه | |
مجدي المصري
....................
*صباح الخير يا أستاذ ..
*صباح النور .. أي خدمه ؟
*من فضلك لو سمحت أنا عايزه أتجوز ..
*نعم !!.. هنا مكتب الخدمات الجماهيريه التابع لوزاره التنميه الإداريه .. وليس مكتب الخاطبه ..
*أنا عارفه إنه مكتب خدمات جماهيريه اللي عاملاه الحكومه علشان تقدم خدمات للشعب وأنا عايزه خدمه من الحكومه علشان أنا من الشعب ..
*ياآنسه .. من فضلك روحي للخاطبه .. وهي تجيب لك عريس .. وأتركينا نشوف شغلنا
*ياأستاذ .. أنا مش جايه أشحت منك والا من الحكومه .. أنا مواطنه وليا حقوق وجايه أطلب خدمه من الحكومه ..
*يا آنسه .. خدماتنا فقط شهادات إداريه ميلاد بطاقه تموين زواج ..
*أيوه .. إنت قلتها زواج ..
*أقصد شهاده .. مش عريس ..
*لو سمحت يا أستاذ كلمه الخدمات تشمل كل الخدمات وده واجب علي الحكومه إنها توفق رأسين في الحلال ..
*يا آنسه اللي بتوفق رأسين في الحلال هي أم محمود الخاطبه مش الحكومه ..
*طيب أم محمود دي بتشتغل في أي وزاره ؟
*أم محمود مش موظفه حكومه .. أم محمود الخاطبه روحي لها في بيتها ..
*إزاي يا أستاذ الكلام ده .. الحكومه كلها تطلب مني أتعامل مع جهات غير حكوميه في خدمات جماهيريه حساسه .. المفروض إن الحكومه عامله مكاتب لتقديم الخدمات الجماهيريه .. معني كلامك إن الحكومه بتتخلي عن مهمتها وتسيبها لناس تانيه تشتغلها من الباطن .. وكمان الحكومه مش بتحس بمعاناة المواطنين ..
*يا آنسه .. إنتي بتعطلي دولاب العمل وده مش في صالحك ..
*دولاب إيه وسرير إيه يا أستاذ .. مش لما نلاقي العريس الأول نتكلم في الفرش والجهاز وعلي العموم مش حا نختلف في الفرش ..
*يا آنسه من فضلك إمشي من هنا والا سأطلب لك البوليس ..
*بوليس !! .. ليه هو أنا حراميه .. مسكتني بأسرق فلوس الحكومه والا فلوس الشعب ..
أنا واحده محترمه مش حراميه .. ومش حا أمشي من هنا الا لما أقدم طلب علي عريس والا إنتم ياحكومه .. بس فالحين تقبضوا مرتبات قد كده علي قلوبكم وما تشتغلوش بيها
*الظاهر مفيش فايده معاكي أطلب لك البوليس أحسن ..
*أطلب هو أنا خايفه ..
في قسم البوليس
*إيه الموضوع ؟
*الآنسه دي عطلت دولاب العمل في مكتب خدمه المواطنين التابع لوزاره التنميه الإداريه وتعدت علي الحكومه بالقول واللفظ ..
*حيلك حيلك دولاب إيه يا أبو دولاب .. ناقص كمان تقول إني إتحرشت بالحكومه وتعمل لي قضيه آداب أنا والحكومه ..
*بس .. محدش يتكلم .. ح أعمل لكم محضر إنتم الإثنين وأعرضكم علي النيابه ..
*لا يابيه .. إعمل محضر للحكومه بس .. هي اللي مش بتشتغل كويس .. واللي بتسألها علي عريس .. بتقول لها روحي لأم محمود الخاطبه ..
*يعني إنتي كنتي عايزه الحكومه تجوزك .. والحكومه رفضت .. وعايزه تعملي للحكومه محضر بالكلام ده ..
*خلاص ياباشا .. حسبي الله ونعم الوكيل في الحكومه .. بس والنبي تقول للحكومه الإنتخابات جايه وإبقي قولي والنبي إنتخبوني ..
