سنين الغربه    ذكى   شعر: ماهر ذكى ....................       سنين الغربه مابترحمش و أيامها كتيره ياناس و مابتخلصش و ليلها طويل بميت ساعه فاكركم و الله ياجماعه تروح عيل .. تعود راجل ده هي ياخويا فركة كعب و هما يومين هاتعمل فيهم القرشين و تعمل بيت و تتجوز و تتحدى الزمان الصعب ماشوفتش حمدي و اخواته ماشوفتش مصطفى وعادل و انا مصدق .. و قاعد أرد بسكوتي و في الأخر اروح و بنفسي زي كتير  احجز تذكرة موتي .. و انا عايش ماهي الغربه مابتفرقش مابين ميت و بين عايش و يوم سفري .. و انا فـ بيتنا  باودع كل جدرانه اشوف امي بتجمع كل قوتها و بتمثل و بتداري في دمعتها تحط ايديها في ايديا اوطي عليها و ابوسها ابوسها يمكن عُشرميت مره و ارفع راسي و اشوفها و اشوف في عينيها ألف سؤال ياترى يابني هاييجي عليا يوم تاني تبوس ايدي كمان مره هاشوفك تاني ياضنايا احس بشوقها جوايا و انا في بيتنا  أجُر الشنطه و اتحرك لحد الباب و ماقدرش و ارجع تاني و ابوسها و احضنها و هي تداري في دموعها و انا ابكي و عيني تروح على اخواتي و يجروا عليا من خوفهم و من خوفي ألف دراعي و احضنهم و مش فاهم مانيش مجنون مانيش عاقل و هي تزق و تقوللي تروح عيل تعود راجل و برضه تداري في دموعها وانا ابكي و قبل ماتبتدي الغربه احس بكسره جوايا ولحظه كان تمنها كبير و انا بادفع و اعيش في الغربه  زيي زي غـُربا كتير  بنتبهدل و نتعذب نقضي الليل يادوب نحسب علشان البيت و دي الشبكه .. و ده للعفش و تتلخبط ....   تعيد الحسبه من تاني تلاقي ده كله ماهاينفعش تقول تاني مابين نفسك دي فركة كعب من تاني و ترجع تاني بعد سنين تعيد الحسبه من تاني و تبدأ في الطريق الصعب و غربه تعد ع الزيرو كأنه طريق مفيش غيره تعيش في الغربه مش عايش تعيش ناسي .. تعيش فاكر هنا اصحابي و احبابي هنا بيتنا و لمتنا و صحبتنا و تيجي تفتكر اسمك تلاقي الدنيا غداره و ليل الغربه حمله تقيل تعيش و تعد في الغربه و تحسب ليها ميت حسبه و مهما جمعت من خيرها مابتشبعش و اللي معاك ماهاينفعش تعيد الفركه من تاني و فركة كعب ع الزيرو سنين و سنين اتاري الغربه لبلابه و بتفرع على كتافنا حزننا كتير بكينا كتير في غربتنا و مين شافنا تروح عيل تعود راجل معاك قرشين و هيا ياخويا فركة كعب و ترجع لينا من تاني و تتحدى الزمان الصعب و تعمل بيت وتتجوز مش احسن لك بميت مره و مره تعد على مره مانعرف حلوه من مره و لو تندم هاتندم ليه اديك عايش و لو قولنا في يوم نرجع نلاقي الغربه ماسكانا ماهي الغربه بتهوانا و احنا كمان بنهواها و نهوى راحتها وعذابها و نهوى خيرها و هواها  ونقنع نفسنا بيها و احسن ياخويا ميت مره و نقبل .. و نرجع نقلب الكره و نرجع تاني للغربه و نتسلى و نبكي كتير و نتهنى  دايره كبيره مابتخلصش و حتى كلامنا مابيطلعش نسينا كل شئ فينا نسينا ازاي كده نسينا دي ايامنا اللي عايشانا ولا هي اللي عايشه فينا     06/11/2014 مصرنا ©