اطبخ ياعبد .. كلف ياسيد   الحاج   بقلم : غريب المنسى ........................ ترن .. ترن .. تررن .. ترن.. رفعت الحاجة التليفون وكان المتحدث على الطرف الآخر زوجها الحاج : - ياحاجة أنا النهاردة باذن الله عازم ضيوف أمريكان على العشاء عاوزك تحضرى ليهم وليمة محترمة من ايديكى اللى تتلف فى حرير - من عنيا ياحاج .. بس من رأيك أعملهم ايه ؟!! - ياحاجة أنا قلت وليمة ياعنى : ديك رومى محشى بالمكسرات على دستة حمام برضه محشى ومتحمر فى السمن البلدى على دكرين بط على كام كيلو كباب على كام صنية بقلاوة وكنافة وهريسة وباقى الرفايع من مشاريب سخنة وساقعة وماتنسيش الفواكه والشاى الأخضر المثلج الجماعة عاملين دايت - من عنيا ياحاج .. بس العزومة دى حتتكلف كتير ياحاج !! - ياحاجة اتصرفى .. انتى عاوزه تحرجينى قدام الضيوف الأمريكان .. ياستى هاتى ع النوته .. مااحنا اصلا عايشين ع النوته .. الى أن يفرجها ربنا .. - ياحاج هو ربنا حيفرجها امته بقى!! احنا خلاص بقينا ع الحديدة وانته ياحاج عمال تعزم شمال ويمين .. عزومتك دى حتكلف ألفين جنيه .. - ياحاجة الضيوف دى غير الضيوف التانية .. دول أمريكان وحيساعدونى جدا جدا جدا .. - انته لسه عايش فى الوهم ياحاج؟ عموما أنا حاتصرف ولما تبقى واصل ماتنساش اننى عاوزة بس أروح أحج ودى كل أمنيتى فى الدنيا - ياحاجة .. بطلى فلسفة أنا كل اللى عاوزه منك بس تعملى وليمة منظرها حلو ومش مهم احنا جايبين الفلوس منين , المهم انهم يخرجوا من عندنا مبسوطين وراضيين عليا .. انت عارفه ان مستقبلى السياسى كله مرتبط برضاء الأمريكان, والحمد لله هما لحد دلوقتى راضيين عليا .. وده كله ببركة دعاء الوالدين.. أمى كانت بتدعيلى علطول .. ويابركة دعاءها ساعة رضاها .. مستر جون وافق انه ييجى يزورنى النهارد هو والحاجة مراته والوفد المرافق ليهم وده تكريم مابعده تكريم , بكره ياحاجة حنلعب بالفلوس لعب .. !! - ايدى على كتفك ياحاج .. بس الضيوف دول بيتكلموا عربى زيننا؟ - ياحاجة انتى بس لما تشوفيهم قولى هالو وبس , أنا بافهم عليهم وهما فاهمينى كويس , أنا مستوايا فى الانجليزى رهيب .. - ماشى ياحاج .. بس مش حتدعى الحاج الكبير؟ - لالالا الحاج الكبير بيقعد فقط مع الأوليا والصالحين.. وحسن أؤلئك رفيقا !! يلا ماتضيعيش وقت وقومى حضرى الوليمة .. - حاضر ياحاج - السلام عليكم ياحاجة - سلام ورحمة الله ياحاج ***** بعد أن تناول الحاج وضيوفه العشاء جلسوا يتناقشون فى مشاكل الساعة وكان الحاج فى حالة نفسية وذهنية جيدة جالسا بسرواله الأبيض والمسبحة الطويلة أم عداد على الأريكية الرئيسية والصفاء والشفافية تشع من وجهه البهى .. - الناس هنا لازم تتعلم الديموقراطية والحرية والعدالة الاجتماعية وحرية المرأة والشفافية ياحاج - طبعا طبعا يامستر جون .. ان شاء الله حنعلمهم الديموقراطية والحرية والعدالة الاجتماعية وحرية المرأة والشفافية والاتيكيت والبرتوكول والأدب كمان - الرئيس جون كلفنى بهذه الرسالة : قول للحاج يشد حيله شوية - يامستر جون أنا خدامك انت والرئيس جون بس سيادتك عارف ان الليبراليين والعلمانيين والكافرين هنا مقرفين شوية كل ماالحاج الكبير يعمل حاجة يقوموا بمظاهرات وعربدة ويكسرو فى البلد - الرئيس جون بيقولك اتصرف - أتصرف ازاى يامستر جون؟ - الرئيس جون بيقولك اتصرف وخلاص ياأخى .. انته مرحتش الجيش والا ايه؟!! - يامستر جون الديموقراطية والحرية والعدالة الاجتماعية وحرية المرأة والشفافية حتتكلف كتير .. الرئيس جون عمال يقول اتصرف وطبق الديموقراطية والحرية والعدالة الاجتماعية وحرية المرأة والشفافية بدون أن يرسل المعلوم وأنا محتاج المعلوم لأن مافيش ديموقراطية وحرية وعدالة الاجتماعية وحرية المرأة وشفافية ببلاش - مش فاهم ياحاج؟ - يامستر جون أنا عندى هنا فى البلد دى تسعين مليون بنى آدم علشان أعلمهم الديموقراطية والحرية وحرية المرأة والشفافية مرة واحدة فى اليوم بسعر الحصة دولار واحد ياراجل حتكون التكلفة تسعين مليون فى الشهر يعنى فى السنة مليار دولار وده من غير الدروس الخصوصية والوقت الاضافى !! - ياحاج احنا دايما بنطالب الشعوب النامية بتطبيق الديموقراطية والحرية وحرية المرأة والشفافية وهما دايما بيوافقوا وخلاص .. انته أول واحد اكتشفت ان العملية بتتكلف فلوس - يامستر جون انته بتطالبنى بتغيير ثقافة تسعين مليون بنى آدم ومتصور اننى حاأضغط على زر يحول هؤلاء القوم الى عشاق للديموقراطية والحرية وحرية المرأة والشفافية؟ وبعدين الشفافية بالذات هنا عاوزة تدريس اضافى ودروس خصوصية وحتتكلف ضعف تكلفة الديموقراطية والحرية وحرية المرأة . - ليه ياحاج ؟!! - لأن التسعين مليون بنى أدم مافيش واحد منهم شاف شفافية فى حياته .. فالشفافية هنا من الممنوعات ولما يكون انسان ماشفش شفافية فى حياته أول مرة بيشوفها بيتهبل!! - ياحاج أنا رسول الرئيس جون وماعلى الرسول الا البلاغ والرئيس جون بيقولك كلف الديموقراطية والحرية وحرية المرأة والشفافية ع النوته .. ماانتم اصلا عايشين ع النوته .. الى أن يفرجها ربنا .. - حاضر يامستر جون بس والنبى تقول للرئيس جون فيه مثل بيقول : أطبخ ياعبد .. كلف ياسيد - حاضر ياحاج   06/11/2014 مصرنا ©