الصعود للحفرة   الرئيس   بقلم : غريب المنسى ........................ جلس الرئيس فى غرفة مكتبه على الكرسى الجلد الرعاش بعد صلاة العشاء وطلب من السيدة الأولى أن تعد له فنجان قهوة سادة وطبق قطايف قبل أن تذهب الى فراشها وقبل أن يبدأ هو فى صلاة التراويح والنوافل فى هدوء القصر الجمهورى, وبعد أن قدمت له السيدة الأولى فنجان القهوة السادة المحوج والقطايف المحرمشة قالت له : تصبح على خير ياحبيبى, فرد عليها الرئيس بكل رومانسية : تصبحى على خير ياحياتى , وانصرفت السيدة الأولى وقبل أن تدلف من باب حجرة مكتبه نادها الرئيس بصوت خفيض : - ممكن تفكرينى بمفتاح باكستان ؟!! - نظرت اليه باستغراب .. ليه ؟ هو احنا مش بنطمئن عليه من محمد - لا أنا مش حاكلم أيمن أنا حاكلم عبقدير واحد صاحبى باكستانى - خد بالك ياعمرى التليفونات هنا متراقبة - ياستى ماتخافيش .. أنا حاتكلم من على الخط الأحمر - عبقدير ده مش هو الراجل بتاع النووى اللى دوخ أمريكا؟!! - هو ياستى لادوخ أمريكا ولاحاجة , انتى عارفه الاعلام بيعمل من الحبة قبة وبالذات الاعلام الغربى المجنون , وانتى شايفه أهوه احنا مابقلناش شهر هنا ولسه بنقول ياهادى وعمالين يقولوا علينا ايه !! - بس ياحبيبى أنا قلبى بيقولى أن الراجل ده معرفته تودى فى داهيه, أنا عوزاك تخلص الأربع سنين بتوعك ونتوكل على الله بدون مشاكل, واديك جربت انك تبقى رئيس وأنا سيدة أولى والعيال فرحانين والحمد لله ربنا أكرمنا نروح نحج ونعمل عمرة ونبعد عن السياسة ووجع القلب. - مش قبل ماأكلم عبقدير - ياحبيبى أنا خايفة عليك - ياستى ماتخافيش ربنا معانا *********** على الخط الأخر كان عبقدير وبالرغم من انه فى اقامة جبرية فى منزل مجهول وتحت حراسة شديدة كان متقد الذاكرة .. - مبروك يامحمد .. أنا متابع أخبارك ياهنيالك ياعم .. - الله يبارك فيك ياعبقدير ... كيف حال شرمين وعمران وبنازير - الحمد لله كلهم بخير , عمران أصبح استاذ فى جامعة اسلام آباد وبنازير نائبة فى البرلمان وشرمين ذهبت لعمرة رمضان وأنا هنا محبوس بسبب البرادعى !! - أنا عارف ياعبقدير, البرادعى عملك شبورة وقلب عليك الدنيا , أنا عارف أنك كنت بتاكل عيش من عملية بيع المعلومات والمعدات .. منه لله قطع عيشك عشان يراضى أمريكا وفى الآخر أمريكا أيدتنى أنا وأهملته هو.. أمريكا بتحب الرجالة العدلين وأنا زى مانت عارف ياعبقدير , أنا من قصر الرئاسة للجامع لقصر الرئاسة .. عدل ومستقيم - والله عارف يامحمد ربنا يقويك على مشاكل شعبك, والله احنا هنا برضه عندنا مشاكل مع الهند وكرزاى وطلبان وأمريكا , ودايما امريكا بتتهمنا اننا مش جادين فى الحرب على الارهاب .. والبرادعى الله يخرب بيته بلغ عنى وقالهم اننى باببيع ممنوعات , ولولا أننى بطل قومى هنا كان زمانى فى جوانتانامو .. الحمد لله على كل حال - ياعنى أنته بطلت تبيع ياعنى؟ - لا .. بابيع على الخفيف للزباين اللى أعرفهم وأثق فيهم - يعنى مش حتكسفنى لو قلتك أنا عاوز وقيه - هههه .. دايما دمك خفيف يامحمد حتى من أيام البعثة - اسمع ياسيدى , أنا عاوز واحدة تقيلة .. تتكلف كام؟!! - واحدة بس؟!! - أنا مش طماع أنا عاوز واحدة أخوف بيها العالم .. علشان يحترمونى شوية .. كل يوم اسرائيل عاملة مشكلة على الحدود وقرفانى .. وبعدين قلت أكلمك وأشوف أسعارك ايه؟؟ - لو واحدة بس .. خليها عليا أنا - تسلم ياعبقدير.. أنا عاوز واحدة استيرايجية مجرمة - بص يامحمد.. التقيل ده اللى بالك فيه صعب اليومين دول أمريكا مفتحة عينيها قوى ,وحتحتاج معامل وقطع غيار ومعدات وعلماء وفنيين وبعد ماتوفركل ده أمريكا مش حتسيبك , شوف هما عاملين فى ايران ايه؟ علما بأن ايران وعلى ايدى أنا معندهاش أساسيات التقيل خالص .. نصيحة من أخوك عبقدير , خليك فى القذرة .. سهلة وممكن تتصنع محلى وأمريكا مش حتعرف عنك حاجة خالص - ياسلام ياعبقدير .. كلك علم ومعلومات , ممكن تنشط معلوماتى وتفكرنى بالقذرة .. أنا كنت مشغول الكام سنة اللى فاتو دول بالسياسة ونسيت المعلومات العلمية .. لعن الله السياسة - القذرة ياسيدى محمولة مش محتاجة لاطلاق وتأثيرها واحد على عشرة من التقيلة وبتعمل نفس التأثير السيكولوجى ولو أمريكا عرفت انك معاك واحدة أو اثنين منهم تبقى تقعد وتحط رجل على رجل وتقول أنا عمهم.. - ايدى على كتفك ياعبقدير .. أخوك مزنوق خالص - بس خد نصيحة من أخ : ده مشروع فاشل .. مفيش أحسن من راحة البال .. أنا عملت ربعمية مليون دولار من الموضوع ده وزى مانته شايف أهوه قاعد محبوس فى بيتى .. - ياعبقدير أنا عاوز اثبت لشعبى انى راجل رادع واستيراتيجى - بس يامحمد حتكون نهايتك فى الحفرة .. - ياسيدى أنا فدا بلدى بس أحط ايدى على القذرة.. - يعنى مصمم؟ - ايوه مصمم - خلاص كلمنى الاسبوع الجاى زى النهاردة وفى نفس الساعة حأكون محضرلك الوصفة والرجالة اللى حتساعدك - مش معقول .. بالسهولة دى؟!! - وكمان علشان خاطرك الرجالة والخلطة موجودة عندك ومش حتحتاج لا لفرنسا ولا للأرجنتين ولا لجنوب أفريقيا, أنا عندى شبكة انتاج عالمية ولها فروع عندك!! - انا مش مصدق ودانى .. يعنى ممكن يبقى عندى عشرة منهم - فى الحالة دى لازم أحاسبك .. الواحدة بعشرة مليون - لا لا .. خلينا فى واحدة بس فى الوقت الحالى - منتظرك .. كلمنى الاسبوع الجاى - شكرا ياعبقدير .. ورمضان كريم - الله أعلم يامحمد - تتبع-   06/11/2014 مصرنا ©