محمدين   محمدين   بقلم : غريب المنسى ........................ محمد: مكنش العشم تعمل كده يامحمد. محمد: عملت ايه؟ مش انته اللى غضبت وروحت على شرم الشيخ. محمد: يامحمد أنا كنت زعلان منكم ومن الشعب حبتين,وكنت متعشم انكم حتيجوا ورايا وتتحايلوا عليا علشان أرجع!! محمد: ترجع فين ياعم؟ احنا ماصدقنا انك زعلت!! محمد: اه ياخبيث .. ضربتنى كتف قانونى !! وركبت. محمد: ماحنا عاملينك مستشار فنى , وبنسئلك نعمل ايه فى معظم الملفات الوسخة اللى انته سيبتها مفتوحة!!عاوز ايه تانى , احمد ربنا ان احنا طلعنا جدعان معاك. محمد: آه ياندل .. أنا اللى عملتك وتقولى مستشار فنى !! محمد: ايه المشكلة ؟!! انته خدتها من محمد واديتها برضه لمحمد.. هى ياعنى كانت بتاع أبوك!! محمد: المهم انته عامل ايه فى السجن؟!! محمد: حأعمل ايه يامحمد !! راقد فى السرير أهوه , وعمال اتفرج عليكم وانتم بتقوموا بمهامى الدستورية!! محمد: خليك راقد يامحمد..رقدت عليك حيطة العنبر!! محمد: آه ياندل .. كنت بتتصل بالأمريكان من ورايا !! محمد: أمريكان ايه بس يامحمد!! الأمريكان فتحين خطوط مع كل كلاب البلد, انته لسه عايش فى الماضى. محمد: الأمريكان نا...نى يامحمد .. آه .. زى مانا..و محمد .. وح..ك يامحمد. محمد: خليك فى نفسك يامحمد , لما ييجى الدور عليا يبقى يحلها حلال.. يامحمد خليك متفائل, ليه انته متشائم كده يأخى, روح صلى ركعتين واقرأ سورة الاخلاص. محمد: وكمان بقيت شيخ يامحمد محمد: الحمد لله على نعمة الاسلام .. محمد: شكلك كده كنت بتتصل بالسعوديين من ورايا !! ماهما برضه نا...نى ع الخفيف. محمد: فاكر لما الرسالة نزلت على سيدنا محمد , وكان سيدنا على نايم فى فراش الرسول, حتى يحمى الرسول بحياته ! احنا هنا حنحمى مصر بحياتنا برضه , مصر يامحمد وطن يعيش فينا !! محمد: وكمان بقيت شيعى يامحمد , شكلك كنت بتتصل بايران من ورايا.. وكمان بتقتبس من شنوده!! شكلك كنت بتربط معاه من ورايا ياندل. محمد: يامحمد أنا جالى الشاه فى المنام وقالى: همهٔ افراد بشر آزاد زاده می شوند و از دید ارجمندی و حقوق با هم برابرند، همه دارای اندیشه و وجدان هستند و باید در برابر یکدیگر با روان برادری رفتار کنند. محمد: خلينى اشوفلك مترجم علشان نشوف الشاه قلك ايه فى المنام. محمد: مترجم ومفسر احلام لوتقدر. محمد: البلد بقت خرابة يامحمد محمد: ماأنا عارف محمد: وبقت مخترقة يامحمد محمد: ماأنا عارف محمد: والناس كفرانه يامحمد محمد: ماأنا عارف محمد: ومش لاقيه تاكل يامحمد محمد: ماأنا عارف محمد: أما انته عارف يامحمد , ماقلتش ليه؟! محمد: العارف لايعرف يامحمد محمد: يعنى المواضيع دى كنت عارفها ومطنش يامحمد؟ محمد: يامحمد انته لسه جديد فى البيزنس , لما تقدم شوية حتعرف اننى كنت فليسوف!! محمد: انته شكلك كده يامحمد كنت على اتصال بالعفاريت من ورا الشعب. محمد: يامحمد انته لسه بدرى عليك على ماتفهم نظريتى فى الادارة. محمد: ماشى يافليسوف العصر .. حنسميك محمد نيتشه.. ههههههههههههه محمد: اضحك براحتك يامحمد .. بس ماتنساش أننى مقعدكم كلكم على خابور. محمد: سيبك بقى من السياسة يامحمد.. هى اللى أصابتك بالتعاسة, أخبار الصبغة ايه يامحمد؟ محمد: آه ياندل , فكرتنى .. الصبغة فى السجن مغشوشة!! شوفتنى وأنا نايم ع السرير .. شعرى بقى فيرانى خالص. محمد: لالالا مايصحش يامحمد أنا النهارده حابعت لك كيس صبغة مخصوص من بتاع الجنزورى. محمد: ماتجيبش اسمه على لسانك, أنا برىء منه الى يوم الدين!! محمد: ليه يامحمد؟ محمد: من غير ليه يامحمد !! محمد: فاكر قصيدة من غير ليه؟!! يامحمد. محمد: ايوه يامحمد فكرنى بأيام الفن الجميل .. فين أيام عبحليم وأم كلثون!! محمد: فاكر انت الحب يامحمد .. ياسلام أغنية عظيمة قوى. محمد: ومين ينسى دى .. سيادتك الحب يافندم. محمد: نجحت فى الامتحان يامحمد, لأه .. أصيل يامحمد. **** ترجمة الفارسى: كل الناس بيتولدو أحرار ومتساوين فى الكرامه والحقوق. لهم عقل وضمير ولازم يعاملوا بعض بروح الأخويه.   06/11/2014 مصرنا ©