هريدى
هريدى
اجتمع مجلس الأمن القومى لمتابعة تداعيات الوضع المفاجىء الذى نشأ عن اعلان الدكتور "م" لترشيح نفسه فى الانتخابات القادمة , فالرجل له كاريزما خاصة شدت اليه جموع الشعب ولخبط موازين العصابة التى افترضت سيناريو واحد فقط فرضته على الناس, ولكن على مايبدوا أن الدكتور "م" رجل مشاكس لأنه فى مرحلة سنية وعملية تجعله يجلس مستريح مستمتعا بدفء النجاح حتى الموت, ولأن الاجتماع أمن قومى فلابد أن تكون الأسماء المتداولة كودية لزوم تحليل الملايين التى تصرف سنويا على هذا الجهاز , وحتى يظهر المجتمعون أنهم متخصصون , فقد أطلق مدير المخابرات العامة " هريدى" على الدكتور "م" ربما لأنه صعيدى , أما مدير مباحث أمن الدولة اطلق عليه " برعى " وهى ربما الأقرب الى اسم عائلة المذكور أما مدير المخابرات العسكرية فقد أطلق عليه " عوكل" بدون ذكر الأسباب.
وفتحت كل ادارة من هذه الادارات ملف أمنى للرجل وكأنه مجرم هارب من العدالة , وتنافسوا فيما بينهم على اظهار أيهم أكثر ولاء للنظام , وجلسوا جميعا فى غرفة الاجتماعات الخاصة بهم فى القصر الجمهورى منتظرين دخول السيد الرئيس, وكالعادة نفش مدير المخابرات ريشه على المجتمعين – قبل دخول الرئيس- فهو الأقرب الى قلب الرئيس بحكم قوة جهازه , يليه فى العجرفة مدير المخابرات العسكرية فهو المسؤول عن تأمين الحكم بمراقبة العسكريين وكتم أنفاسهم هذا بالاضافة الى أنه ممثل المؤسسة العسكرية فى الاجتماع , أما مدير مباحث أمن الدولة فهو رجل واقعى يعرف تماما حجمه فهو أولا وأخيرا رجل شرطه يعتبره المجتمعون بما فيهم الرئيس شخصية مدنية ليست بهيبة وقوة العسكر.
ودخل الرئيس الاجتماع بوجه جليدى لايعبر عن أى شىء , فالاخبار المتواترة تؤكد قوة رد فعل المرشح على الشعب وان الناس بدأت تتكلم فيما بينهم عن التوريث وعن سوء الأحوال الاقتصادية علما بأن هذا النظام قد بنى لهم طرقا وكبارى !! وجلس الرئيس على مقعده فى قمة الطاولة , ونظر اليهم نظرة معناها قولوا حاجة جديدة.
- صباح الخير ياولاد .. عاملين ايه؟
- تمام يافندم .. فى صوت واحد
- يافندم .. أنا جاهز بتقرير المخابرات
- اتفضل .. اشرح
- تقرير المخابرات يافندم بيؤكد أن هريدى مدمن بيتزا .. من خلال مراقبة مستمرة , وجدنا أنه يطلب بيتزا باستمرار فى مكتبه وفى منزله وقد تأكدنا أن زوجته لاتطبخ فى المنزل على الاطلاق , ومن وجهة نظر الأمن القومى أنه لن يصلح أن يكون رئيسا , لأن المفروض فيمن يتولى هذا المنصب أن يكون مدمن بامية , وملوخية , وبدنجان بالخل والثوم .. هذا طبعا بخلاف البصارة والفول والطعمية يافندم !!
- نعم .. نعم .. أنا برضه كنت عاوز ألفت نظر السادة الكتاب والمفكرين والمجاهدين والمعارضة لهذه النقطة الخطيرة .
- أيوه يافندم .. على الطلاق انته عمهم ولايهمك ياريس .. ايش جاب لجاب يافندم .. بياكل بينزا يافندم علطول .. وأنا من رأييى ان احنا نطلع عليه اشاعة انه مستثمر فى شركة " بيتزا هوت" اليهودية , وانه صهيونى .
- ويافندم رأى الجيش فى عوكل ثابت وصريح , عوكل يافندم لم يخدم فى الجيش ولايعرف الفرق بين الطلبه والمراسلة ولاحتى الفرق بين الكنجى والشينجى والبرنجى .. وهذا يافندم ضد توجهات المؤسسة العسكرية , من يصلح لحكم مصر يافندم لابد أن يكون اتمرمط وانقبض عليه من الشرطة العسكرية لأانه مثلا ماشى بدون تصريح أو شعره طويل .. لالا أطمئن يافندم .. وأنا سيادتك مش عاوز أكرر ماقاله مدير المخابرات ولكن , أقطع دراعى أنك الخير والبركة ولايمكن أبدا أن نسمح لعوكل بالرياسة.
- أما يافندم التقرير الداخلى عن "برعى" مطمئن جدا , تصور يافندم عمره مااشترى سجاير فرط فى حياته , وعمره ماوقف على عربية فول مدمس وعمره ماتشعبط فى أوتوبيس , حيحكم مصر ازاى يافندم؟؟ ده حته عمره ماقعد على قهوة ولاعاكس بنات ولا حبس أنفاس , كان طالب مستقيم .. صميم يافندم , وأنا بصراحة شايف انه حيكون رئيس نظرى , احنا عاوزين رئيس صايع يافندم .. ولامؤاخذه يافندم هو مايجيش جانبك حاجة خالص.
- شكرا ياولاد طمنتونى , أيوه كده خليكوا صاحيين للمؤامرات الخارجية , البلد أنا مجنبها مخاطر كبيرة ومن ساعة ماخدتها وعمرنا مادخلنا حرب وانتوا شاهدين على الخير اللى احنا فيه .. أنا لما كنت فى سنكم كان دخلى ثمانين جنيه فى الشهر , انتم كل واحد فيكم دخله لايقل عن اتنين مليون جنيه فى الشهر , بخلاف المخصصات السرية والبدلات , شوفتوا الخير اللى احنا فيه ياولاد , جاى واحد من بره عاوز يضيع الخير ده كله, ويقول ديموقراطيه ؟!!
- وأخبار كفايه ايه ياولاد؟
- كفاية يافندم بتحتضر .. آخر الأخبار يافندم انهم عاوزين يروحوا المطار يستقبلوا هريدى .
- ماشاء الله .. ماشاء الله!!
- يافندم كفاية وعدت الناس بسندوتش كبده مستورده لكل مواطن , وطبعا ده عرض خيالى جدا لذلك احنا متوقعين أن حيكون هناك فى المطار على الأقل مليون مواطن يافندم , ولو كفاية قالت سندوتش لحمة العدد حيضاعف .
- وايه الخطه المضاده ؟
- يافندم .. احنا حنعمل انفجار جنب المطار ونقول عتاصر ارهابية ونشتت الناس ويكون استقبال عوكل بدون تركيز لاننا حنقفل الطرق المؤدية للمطار وممكن نحول طائرة عوكل لأسيوط لدواعى أمنية... دى فى ايدينا يافندم اطمئن خالص.
- عفارم عليكم ياولاد .. يلا بقى روحوا شوفوا شغلكم
- أحلامك أوامر يافندم.
استمر
