سلامة مرارتك ............................................................... سلامة مرارتك أبو زيد بيومي سلامة مرارتك يا فاقع مرارة مراة الفقير فلا جوزها جايب ولا الفقر تايب ولا حتي سايب مية فــ قلة ولا كوز فــ زير سلامة مرارتك *** سلامة مرارتك ..... مرارة العُـزاز و إيه يعني إحنا .... ما نولع بجاز إنت الحقيقة و إحنا المجاز تفضل و ييجي بدالنا البديل شوية خباثة وعوامل وراثة نصبح بهايم ... ونصبح بديل فتقدر ساعتها تنام ملو عينك ويعلى الشخير سلامة مرارتك *** سلامة مرارتك سلامة المرارة يا واقع علينا بسعر الخسارة فلا فيه صناعة ولا فيه تجارة ولا فيه مدير ولا فيه إدارة ولا فيه وزارة تسيب الوزير سلامة مرارتك *** سلامة مرارتك فداها المواطن أبو قلب راطن كلام الهموم فلا نفس راضية ولا جتة فاضية بلاوي وسموم ولا علاج مداوي مفيش غير حكاوي بتاخد بإيدنا لآخر المصير سلامة مرارتك *** سلامة مرارتك ... ألفين سلامة يا سايب فــ كل المنازل علامة مجاعة ..... أنين ..... كآبة ..... ندامة جهل و بطالة و عوالة و عيا وفنون رخيصة وقلة حيا وهموم بتكتر ... وهموم تزيد إنت فـ زيادة همومنا خبير سلامة مرارتك *** سلامة مرارتك يابو القد فارع يا مالي عنينا بزبالة الشوارع أمال بندفع ضرايب لمين شمالك بتاخد .... و واخدة اليمين شكلك بتحلف علينا اليمين ما تجعل فــ جيبنا قليل أو كتير سلامة مرارتك *** سلامة مرارتك دي واخدة الحصانة بنشقى وتاكل علينا شقانا لا خليّت أمامنا ولا فيه ورانا ضرايب ... عوايد .... فاتورة .... رسوم ننام بالفاتورة و بيها نقوم على البصة ندفع فاتورة لعنينا ولو نعمى ندفع فاتورة ضرير سلامة مرارتك *** سلامة مرارتك يا صاحب الهمم بخطبة بنطلع لأعلى قمم وننزل على جدورنا بين الرمم على الوهم ياما و ياما بنينا أوامر تجيبنا أوامر تجينا على خطوة واحدة فـــ محلك نسير سلامة مرارتك *** سلامة مرارتك إحنا فداها تفرقع مرارتك نفرقع وراها حالنا بدونك عمره ما ماشي إحنا بدونك من غير راعينا ... ومن غير كبير سلامة مرارتك 06/11/2014 مصرنا ©
	.....................................................................................